Urratsak

• 1
  

  Kartoizko zati bat hartu eta 11 cm x 1,5 cm-ko bi laukizuzen marraztuko ditugu.

• 2
  

  Kartoi zatiak moztu guraizeak edo kuterra erabiliz.

• 3
  

  Aluminiozko zintan (edo aluminio paperean) aurreko pausoan sortu ditugun kartoi zatiak baino txikixeagoak diren bi zati markatu. Gure adibidean, kartoizko zatiek 11 cm x 1,5 cm-ko neurriak zituzten eta aluminiozko zintan markatu ditugunek 10 cm x 1 cm.

• 4
  

  Aluminiozko zintan markatutako zatiak guraizeekin edo kuterrarekin moztu.

• 5
  

  Ar-ar kable bat erditik moztuko dugu guraizeekin eta bi zatietan barruko haria bistaratuko dugu.

• 6
  

  Kablearen zatiak aluminiozko zinta zatietan itsatsiko ditugu zinta itsasgarria erabiliz. Aurreko pausoan bistaratu ditugun kablearen hariek aluminiozko zintaren alde metalikoan joan behar dute.

  Modu honetan kablearen eta zintaren arteko lotura nahiko eskasa da eta kablea erraz ateratzen da. Itsasgarria edo eztainuztatzeko gailu bat eskura baduzue aluminiozko zintaren eta kablearen arteko lotura sendoagoa izango da (kobrezko haria aluminiozko zintari soldatzea ez da erraza). Itsasgarria erabiltzen baduzue, kontuan izan kablearen harien eta zintaren alde metalikoaren artean kontaktua egon behar duela. Horretarako kablearen plastikozko zatia zintara itsatsi eta haria zinta itsasgarriarekin bildu daiteke.

• 7
  

  Kablea eta aluminiozko zinta kartoizko zatiaren gainean itsatsiko ditugu. Aluminiozko paperak alde batetik itsasgarria badu hori erabil dezakezue, bestela zinta itsasgarria erabiliz lotu daitezke. Zinta itsasgarria erabiliz gero, aluminiozko zintaren ertzetan bakarrik erabili. Aluminiozko aldearen zatirik handiena agerian geratzea komeni da.

• 8
  

  Kartoizko zatien neurri bereko paperezko zati bat moztu (gure kasuan 11 cm x 1,5 cm) arkatzez margotuko dugu bi aldeetatik.

  Egindako probetan emaitza onenak paper lodiarekin izan ditugu.

• 9
  

  Zinta itsasgarria erabiliz sandwich bat egingo dugu prestatu ditugun hiru zatiekin. Aluminiozko zatiak barru aldera jarriko ditugu eta tartean arkatzez margotutako paper zatia.

• 10
  

  Jarraian tolesdura sentsorea probatuko dugu. Horretarako irudian ikusten den zirkuitoa eraikiko dugu.

  OHARRA: Irudian ikusten dena tolesdura sentsore komertzial bat da.

• 11
  

  Sentsorea probatzeko irudian ikusten den programatxoa osatuko dugu Snap4Arduinon.

  Sentsorea tolestu gabe dagoenean 1023 inguruko balio bat itzuliko digu 0 pin analogikoan.

  Sentsorea tolestean balio txikiago bat itzuliko digu. Tolestean kontuz ibili behar da, kableak ez ateratzeko. Diferentzia handia izatea komeni zaigu, bi egoerak erraz bereizi ahal izateko, baina erabilitako materialen arabera aldea desberdina izango da. Guk emaitzarik onenak paper lodiarekin lortu ditugu. Diferentzia txikia bada beste paper mota bat erabiliz eraiki beharko dugu sentsorea.

  Gure kasuan balio hauek lortu ditugu:

  • Tolestu gabe: 1018 - 1023 artean.
  • Tolestuta: 950 - 990 artean.

  Bi egoerak argi bereizi ditzakegu.

• 12
  

  Behatza tolestuta edo tolestu gabe daukagun jakiteko beste programatxo bat osatuko dugu. Guk muga 1010ean jarri dugu, baina aurreko pausoan lortutako balioen arabera egokitu behar da balio hori.